Saurari Maimaicin Shirin Kasuwancin Zamani

Assalamu Alaikum Warahmatullah!

Barkan mu da wannan lokaci. Dafatan Alkhairi a garemu baki daya. Allah ya sada mu da dukkan Alkhairin dake cikin wannan rana, sannan kuma ya kare mu daga dukkan sharrin da ke cikin ta.

Jama'a, masoya da masu sauraron mu ta Radion Gaskiya Dokin Karfe (Express Radio 90.3 FM) da kuma daukacin wadanda ke tare da mu a shafin internet, muna rokon Allah ya saka kowa da Alkhairi a bisa gudummawa, kwarin gwiwa da goyon bayan da muke ta samu daga gareku, Allah Yabar Zumunci.

Sannan kuma munayi muku albishir da cewa a yanzu ansamar da dandali a cikin Babban shafin mu na kasuwancin zamani wanda akayi wa lakabi da "TASKAR MU" domin baku damar sake sauraron shirin kasuwancin zamani da suka gabata har ma da sababbi.Bayan sauraro za' a iya saukewa ma'ana downloading kenan zuwa cikin na'urorin ku.  http://www.kasuwancinzamani.com/taskar-mu/

Sannan muna bada shawara cewa yana da kyau a ringa sabunta kayan aikin (softwares) na'urorin (Kwamfiyutoci da Wayoyi) da ake aiki da su  anan ina nufin aringa Sofware ko Program Updating ke nan.

Kuma hanyar da ake bi ada domin sauraron maimaicin shirin, tana nan daram. Don haka muke kara yiwa Allah godiya, domin shine ya zabe mu wajen gabatar da wannan al'amari, amma ba don munfi kowa sani ba.

Allah Ya Bamu Alkhairi!!!

Kasuwanci a Yanar Gizo

Itace sabuwar hanyar gudanar da harkokin saye da sayarwa a shafukan yanar gizo cikin ilimin fasahar sadarwa ta zamani. Ta hanyar kasuwancin zamani za’a iya aiwatar da sana’o’i masu yawan gaske. Anan zamu bayyana kadan daga cikin sana’o’in da’ake gudanarwa a yanar gizo.

Gina Shafukan Yanar gizo (Web design):

Wannan zai’iya zama matakin farko, saboda sai an samar da shafukan yanar gizo kafin har akai ga gudanar da sana’o’I ko wadansu al’amura a yanar gizo. Misali: Idan muka duba kasuwannin mu na zahiri za muga cewa anyi musu tsari da gine-ginen manya da kanan shaguna ko runfuna wadanda ‘yan kasuwa suke baje kolen hajojinsu ko sana’ar su a ciki.

Saboda haka sana’ar bude ko gina shafin yanar gizo na da daraja ta farko wajen samar da bigire ko dandalin kasuwanci da sauran al’amura masu yawan gaske.

Dillanci (Affiliation):

Kamar yadda sana’ar dillanci take a kasuwannin mu na zahiri haka take a yanar gizo. Sannan kuma ta kasance daya daga cikin manyan sana’o’i da matsayi fiye da yadda mai karatu yake tsammani. Ana iya diilancin gidaje, hajoji, karatuttuka, kamfanoni da sauran su duk acikin yanar gizo.

Ana bibiyar dillalai har shafukansu na yanar gizo domin basu aikin da suka saba. Har a yanar gizo dillalai sun kasance masu kwazo da hikima wajen shigar da duk irin hajar da aka basu dillanci. Kuma ana basu kamasho mai tsoka a duk kasuwancin da suka gudanar. Idan har dillanci shine sana’ar ka kuma Allah yasa kana da ilimin zamani to aikai sarkine a duniyar gizo.

Dillali zai bude shafi a yanar gizo ya fara tallata kansa ma’ana sana’arsa, yayi cikakken bayanin irin hikimar da Allah ya hore masa, yadda zai ja hankulan manyan kamfanonin yanar gizo. Kuma idan har ya sami aiki ko hajar siyarwa to a wadannan shafukan nasa zai karkasasu kowa ya gani ya kuma kara masu daraja cikin kalamai masu daukar hankalin mai saye har a sami nasara.

Ana iya dillancin maziyarta ma’ana masu yawo a yanar gizo domin bude ido ko neman wasu muhimman bayanai, shi dillalin zai karkatar da akalarsu zuwa wani shafi domin su sami abinda suke nema. Wato ana alfahari da kuma samun alkhairi bisa yawan jama’a a shafukan yanar gizo.

Madaba’ar Jaridu ko Mujallu (Publications or Newspapers) :

A halin yanzu jama’a da dama sunfi son su karanta sababbin labarai da dumi dumin su a yanar gizo fiye da sayen jaridu da mujallu kamar yadda aka saba. Idan har ya kasance mutum yana da hanyoyin samun labarai wadanda jama’a suke da bukata a koda yaushe, to sai ya bude shafi a yanar gizo kuma ya tsara hanyar da jama’a za subi wajen biyan shi hakinsa kafin su sami damar karanta labaran da suke bukata. Idan mai karatu zai iya tuna yadda kafofin yada labarai sukan ce sun samo labarai daga babbar tashar dillancin labarai ta duniya wato Reuters da sauransu.

Kuma za’a iya bada damar karanta labarai kyauta a shafinka na yanar gizo domin ka sami jama’a masu yawan gaske. Wannan yawan jama’ar ko kuma maziyarta za’a iya mayar dashi hanyar samun alkhairi ta hanyar karbar tallace tallace na wasu shafukan ko hajoji kamar dai yadda bayani ya gabata a cikin tsarin sana’ar dillanci a yanar gizo.

Kasuwancin Hadin Gwiwa (Network Marketing):

Wannan shima wani nau’ine na kasuwanci a yanar gizo, inda manyan kamfanonin tallace tallace na yanar gizo suke bayar da tallace-tallace ko dillanci ga matsakaitan ‘yan kasuwa, su kuma sai suyi amfani da wasu hanyoyi ko dabarun kasuwanci domin jawo hankulan kanan ‘yan kasuwa su karbi talla daga garesu. Wanda a karshe suna da riba biyu kenan. Suna samun kamasho a duk hajar da suka sayar da kansu idan wadanda aka baiwa dillanci sukayi ciniki anan ma suna da wani kaso a ciki, saboda sune sukayi sanadin shigar su. Shiyasa ya zama kasuwancin hadin gwiwa.

Ma’ana Kasuwanci ne da yake kara bunkasa a yayin da aka jawo ra’ayin wani ya shigo, akwai kamasho akan hakan. Sannan wanda aka jawo shima idan yayi ciniki ana kara samun wani kamasho. Shima idan ya jawo wasu ciki shima haka zaiyi ta samun alkhairi. Ta wannan hadin gwiwa za’ayi ta karuwa ko bunkasa kasuwanci.

Hada-hadar Kasuwancin kudaden kasar waje (Forex Trade):

A gaskiya wannan nau’in kasuwanci akwai sarkakiya da kuma wahala wajen aiwatarwa. Yinsa sai wadanda suke da masaniya game da hawa da saukar darajar kudaden kasashen duniya. Ni a ganina wannan kasuwanci na hada hadar kudaden waje, yayi kama da sana’ar ‘Yan kasuwar Canji da muke dasu anan. Idan ana neman Jama’ar da za’a baiwa horo akan irin wannan sana’a cikin kankanin lokaci kuma su kware akan lokaci to sai ince a nemi ‘Yan Chanji.

Dangane da yadda ake yinsa bashi da maraba da yadda ake sana’ar chanji a duniyar mu ta zahiri. Kuma a kwai cibiyoyi masu yawan gaske da ake bada horo akan yadda ake gudanarwa. Masu yin wannan sana’a kullum suna gaban na’urar kompiyutar su wadda ke kan tsarin wata yawa a yanar gizo, suna ta hasashe akan riba ko faduwa dake cikin harakar.

Ilimantarwa (Educating):

A halin yanzu ku jama’a kun isa sheda wajen fahimtar yadda shafukan bada ilimi suka yawaita a yanar gizo, kama daga na kyauta har zuwa wadanda sai am biya kudi. A kwai makarantu masu yawan gaske a yanar gizo wadanda ta shafin yanar gizo dalibai suke daukar darussa, suna daga wata uwa duniya, a kasashensu, a garuruwansu kuma acikin dakunansu ta hanyar amfani da kompiyuta da ikon shiga yanar gizo.

Saboda haka Allah kadai shine abin godiya da ya samar damu, kuma ya samar da hanyoyin cin abinci iri-iri a garemu. Idan Allah Ya baka ilimi, basira ko hikima to ai yabaka jari mai girman gaske. A kwai fannonin ilimi wadanda idan mutum ya bude masu shafi a yanar gizo kuma ya tallata wannan shafin cikin ikon Allah sai ya zama alkhairi a gareshi sannan ya sami ladan ilimantarwa a wajen Allah. Don haka yana da kyau mutum yayi amfani da damar da Allah ya bashi akan lokaci tun kafin ta kubce masa.

Idan har kana da gudummawar da zaka bayar a duniya kuma ka sami alkhairi, kai tsaye ka tafi ka sami masu basirar bude ko gina shafi a yanar gizo, ku zauna ka sanar dashi dukkan bukatunka. Shikuma zai baka mamaki wajen tsara maka shafin yanar gizo.

Za’a iya bude shafin yanar gizo domin koyar da sana’o’i wanda nayi imani za’a sami alkhairi maiyawan gaske. Akwai sana’o’i wadanda idan akabude masu shafi a yanar gizo za’a sami cigaba da alkhairi maiyawa.

Kadan kenan daga cikin ire-iren sana’o’in da’ake iya gudanarwa a yanar gizo. Sannan yana da kyau a sani cewa dukkanin wadancan sana’o’i da muka bayyana a sama, baza a iya aiwatar dasu ba har sai an mallaki iIlimin fasahar sarrafa na’urar Kompiyuta (Computer) da makamantansu.

Don haka ga duk mai sha’awar yin daya daga cikin wadancan sana’o’i da muka bayyana kai harma da wadanda bamu fada ba indai a yanar gizo ake gudanar dasu, kofarmu abude take domin baku shawar wari akan a bubuwan da suka dace.

Kasuwancin Zamani yana kunshe da nasarori da alkhairai masu yawa ta fuskoki daban-daban. Yana samar da aiyyuka da kuma kwar da zaman kashe wando da matasa ‘yam boko masu jiran aikin gwamnati bayan an kare karatu.

Ra’ayoyinku na da Muhimmanci a garemu

Bissalam.

Babban Shafin Mu...

JAGORANCI A KASUWANCI

Assalamu alaikum warahmatullah!

Barkammu da sake saduwa a wannan makala mai suna “JAGORANCI A KASUWANCI”. Alhamdulillahi. Sanin kowane a kowacce irin mu’amala tsakanin jama’a, kama da ga mutane uku har zuwa abinda ya sawwaka, dole ne a sami jagoranci domin inganta tafiya ko mu’amala a bisa tsari na hankali da kuma koyarwar ilimi.

Sanin kowa ne Kano itace cibiyar kasuwanci a arewacin kasar nan, Allah Ya albarkace ta da manya da kananan “Yan Kasuwa, Masu sana’o’in hannu da kuma kasuwanni bila adadin. Daga cikin baiwar da Allah yayi wa Kano a kwai mutane masu fasahar kere-keren abubuwan amfanin yau da kullum kama daga na gargajiya har zuwa masu kwaikwayon fasahar zamani ma’ana irin ta bature.

Sai dai kash! Wadannan mutane sunyi rashin tallafi da goyon baya bisa wannan sana’o’i da suke ai watarwa. Basa samun taimako ta ko ina, wanda daga bisani sai kaga anyi ba uwa ba riba.

Alhakin tabarbarewar sana’o’in hannu ko kananan ‘yan kasuwa ya shafi kowa kama; daga Gwamnatoci, Masu hannu da shuni, Jama’ar gari da sauransu. Idan muka dauki gwamnatoci sai muga a baya babu ruwansu da tallafawa masu sana’o’in hannu da dan jarin da zasu bunkasa ko inganta sana’o’in su, kamar yadda kasashen da suka cigaba a duniya ke yiwa jama’ar su.

Kasancewar duk masu sana’o’in hannu ko kananan ‘yan kasuwa akasarin su talakawa ne, dama masu iya magana suna cewa “Allah kadai ke son talaka” to anan sai mu wai wayi Masu hannu da shuni da suka dauki talakawa a matsayin wata halitta, koma baya ko makiya.

Wasu lokautan Masu hannu da shuni suna kallon talaka a matsayin kaska. To ta yaya zasu taimaki talaka da jari shima ya zama abin kwatance. Har kullum sai dai sukarawa masu karfi, karfi.

Idan muka yi duba ga sauran jama’ar gari kuma laifin su shine basa taimakawa ta hanyar saye kudi hannu sai dai bashi, ko kuma suce kayan kasar waje yafi kyau da kyalkyali. Don haka sai su zagaye sutafi ga masu kayan waje.

Masu iya Magana sunce “Idan Bera na da sata Daddawa ma tana da wari” wasu lokutan kananan ‘yan kasuwa ko masu sana’o’in hannu basa inganta sana’o’in su yadda ya kamata, suna yin ha’inci a cikin kayan siyarwar su.

Batun jagoranci a harkokin kasuwanci da muka dauko tun a farko muna ganin shine mafita. Jagorori ko shugabanni zasu taka muhimmiyar rawa wajen kawar da dabi’u marasa kyau da kuma daidai ta dangan taka tsakanin mai saye da mai siyarwa.

Ya kamata Kananan ‘yan kasuwa da masu sana’o’in hannu su samarwa kansu da mafita, ta hanyar samar da Kungiyoyi masu shugabanni nagari, masu amana, masu jajircewa wajen karewa da kwato hakkin wanda aka zalunta.

Ba sai anyi cikakken bayani akan irin kungiyoyin da yakamata a samar ba, ina da yakinin kowa ya san matsayi da muhimmancin kungiya a tsarin kasuwanci da sana’o’in hannu.

Idan muka duba abokan zaman mu a kasuwanni (yarabawa da inyamurai) za muga cewa sun dauki kungiya da muhimmanci ta yadda duk karshen sati sukan hadu (meeting) domin tattaunawa akan abubuwan da suka dame su, har su kai ga samun mafita.

Wannan makala tafi ta’allaka akan masu sana’o’in hannu, saboda kusan sune koma baya wajen rashin fahimta ko sanin muhimmancin kungiya. Anan muna basu shawara da su samarwa kansu kungiyoyi a bisa rukunan sana’o’in su, domin ta hakane zasu tsaya da kafafuwansu, su kwatar wa kansu ‘yanci har sukai ga samun tallafi a kungiyance kama daga Gwamnatoci masu san cigaban jama’ar su, zuwa wasu manyan bankuna ko Kungiyoyi masu son taimakwa kananan ‘yan kasuwa da masu sana’a. Idan mai sana’ar hannu ya kasance a cikin kungiya zaifi samun taimako ta ko ina, sabanin wanda ya ware kansa.

Insha Allah, Kasidar mu ta gaba zatayi duba ga Matsalolin Kungiya a kasuwanci…

Ma’assalam.

Babban Shafin Mu

Kasuwancin Zamani a Kasar Hausa

Assalamu Alaikum Warahmatullah!

"Yan Uwa, Masoya, Masu Sauraron Mu Ta Kafar watsa labarai (Express Radio 90.3FM Stereo - Kano), munayi muku barka da wannan lokaci na babbar ibadah (Ramadan) da fatan Allah Ya karbi Dukkan Ibadar mu.


Muna kara gayyatar ku zuwa babban shafin mu domin ku shigar ko ku zamanantar da sana'o'in ku a duniya baki daya amma ta hanyar yanar gizo. Wanda ke kara kusanci tsakani mai saye da mai siyarwa cikin fadin duniyar mu ta zahiri.


Mun sake samar da wasu tsare-tsare domin cigaban al'amura a shafin, bayan haka muna bukatar shawarwarin ku, Gudummawar ku, tsokaci da kuma gyara daga gare ku domin kara bunkasar cinikayya a shafin yanar gizo.


Sanin kowane cewa arewacin kasar mu waton Najeriya, cibiya ce ta kasuwanci (Musamman Kano), Allah ya albarkacemu da Shahararrun "yan Kasuwa, manya da kanana, masu sana'o'in hannu na cikin gida (musamman mata) da na waje, kai harma da matasa. Ta hanyar amfani da shafuka irin wadannan zamu nunawa (tallatawa) duniya irin sana'o'in mu ko hajojin mu.


Ko Masu yawon bude idanu zasu iya amfani da wannan shafi domin neman abin bukata tun kafin su iso Najeria musamman ire-iren kayayyakin da ake siyar wa ko sarrafawa a kasuwannin mu na gargajiya kamar; Kasuwar kurmi, Kofar wambai ("Yan Takalma) kayan saka ko saki na hannu da sauransu.


Saboda haka yana da matukar muhimmanci mu zamanantar da al'amuran mu kasancewa anyi mana nisa ta fuskoki da ban-daban, kuma da haka ne zamuyi maganin abinda bahaushe ke cewa "BATAN DABO" da 'yan kasuwa keyi. Ku ziyaeci Babban Shafin Mu domin kara fahimtar yadda al'amuran suke KASUWANCIN ZAMANI


Musha ruwa lafiya.


Ma'assalam